قوم يامصري
عادل عثمان الحجار
قوم يامصري ف كل شارع ..
كل حاره
واوعى مرَّه تقول لي حلَّك في الدُباره
قوم يامصري وهز باْديك السواقي
خلِّي نور الشمس يفرح بالتلاقي ...
والسنابل بالأمان تفرح تزغرد
والعيدان تحضن شنوده ويَّـا أحمد
قوم يامصري ..
وابتدي إصنع حياتك
ليه تقول النور خلاص ولَّى وفاتك ؟!
قوم يامصري ..
التاريخ عمره مايرحم
حقِّـنا نصنع تاريخنا
حقِّـنا وبجد نحلم
لو بتعْـلَم ..
قول وجاهد
لو بتجهل ..
قول لي ياابني اللهُ أعلم
مصر مش ناقصه الفتاوى ...
ولاَّ كلمة شرِّ مدهونه بحلاوه
قوم يامصري ..
وامحي بالعِـلم الغباوه
خلِّي نور الحق هوَّ اللي بيشرح
خلِّي أرض المجد تحضنها التقاوي
نفسي أسمع في الغيطان تاني الغناوي
لو سامعني ..
قوم يامصري
لو صعيدي ولاَّ فلاَّح أو سيناوي ...
وبيقين النخل أذِّن ..
قول ناوينا اليوم ده نفرح
قول ناوينا اليوم ده نفرح .
