حجاب ب العشق السري
عمرو شاهين
حجاب بالعشق السرى
اكتبي
من أول السطر اللي منحوت بين ضلوعي
ب أعتذر
مبقش قادر أشوف ملامحي ف نن عينك
مبقتش قادر المسك
و انتى اللي مزروعة ف حضني
مبقتش قادر أحلمك
مع انى سميتك رؤى
ب أعتذر
على انى حبيتك بجد
ولا انى حبيتك بجد
ما شوفتكيش زي الحقيقة
مخلوطة عيني
بعيون قصايد قيس ف ليلى
فطبيعي حسيتك غلط
وعشقت تفاصيلك غلط
ورضيت معاكى أكون مجرد ابن حلم
يشفيكى من داء الكابوس
مع إن أنا وشى عبوس
لكنى ملامحي أتبسمت
أول ما خطيتي ف حياتي
مش فاكر انى ف مره شوفت
قتيل ملامحه بتبسم
لحظه ما دبحوه الجناه
ب أعتذر
على نقطتين من دمى باتوا ع البلوزة
على إني لما بخرّجك
يادوب ب أغديكي ب قزوزه
علشان فضلت أقول كلام
ف عينيكي بوابه القمر
علشان فضلت أعيش حياتي
يادوب أبروز ف الصور
....
اكتبي
على سطر من بين السحاب
إن الهوى بينا حرام
و إن قطمه من قلب المحب
عمرها
ما تبطل صيام
وان المشاعر حاجه مجهولة النسب
وان اللي يعشق في الزمن ده
لابد يعشق عن سبب
اكتبى ان دباديب الغرام
حرضوكي ع الفراق
وان سيل من حبي ليكى
طفا جواكى اشتياق
وان كل حاجه بينا
كات يا دوب أضغاث كلام
لكن خلاص
مبقتش محتاج لك قوى
مبقتش مشتاق لك قوى
أنا رامي حملي على القوى
وبقول يا رب
وأتمنى انه يستجيب لي
ف أكرهك
ف اسمحيلى
اكتب على شَعرك حجاب
ادفن معاه
سنين م القسوة معجونه بعذاب
وانتفض
زى اللي ماتوا مكتفينهم من خلاف
أنا قلبي حب
ولما مات العشق بينا
قلبي شاف
