لحظه واحده
قصاد العين حاجات واحده
تشوفها واشوفها مش واحده
ــــــــــــــــــــ
دا سور عالي ما بينا اتشد
تشوفه جدار تشوفه السد
واشوفه سلمه لبكره
وجسر متين ما بينا اتمد
ـــــــــــــــــــ
دا نور ساطع وعامي الشوف
داريت عينك ملاك الخوف
داريت زيك ملاني كسوف
دا نور خلى الطريق مكشوف
ـــــــــــــــــــ
دي ضلمه وعتمه ساكنه الكون
وليل هادي سكون مجنون
على غيرك ده وقت حنون
ونعمة ستر رب الكون
ـــــــــــــــــــ
وقصر اليد ضيق الحال
ده عذر بجد كسره محال
جسارة قلب طولة بال
وصبر يهد أعتى جبال
ــــــــــــــــــ
حاجات واحده نشوفها اتنين
عيون قاسمه الصور نصين
ــــــــــــــــــ
ما بين اليأس والاحلام
أبص ورا تشوف أدام
تغني حزين اقول يا سلام
على قلبي دا أحلى كلام
ـــــــــــــــــــ
وحتى اللحظه فارقه كتير
ما بين الجهل والتفسير
ما بين ظالم وبين مظلوم
ونية شر لابسه الخير
ــــــــــــــــــ
عيون واحده وشايفه كتير
مرايه الصوره فيها ضمير
شكوكك نابعه من روحك
عنيك مفتوحه بس ضرير
ـــــــــــــــــــ
لكل حكايه وش وضهر
ومعنى بيجري زي النهر
على أد العطش يلقاك
مكان النقطه فين مـ السطر.
