متقول لي إمتى عرفت عيب ؟
=================
لملم دماء الزرع من فوق الرصيف
لملم دموعي وابتدي اعملها رغيف
أنا مش غبي
أنا مش معاك ...
ياللي ف وريدك بالتقي ..
نارك / عماك
كان إيه عماك ...
تبني وتزرع في الربوع ؟!
كان إيه عماك ...
تبني الجيوش ..
تحشدنا للأقصى جموع ؟!
كان إيه عماك ..
تخلص لأمي ونبضها ؟!
كانت بتصرخ ..
قول لي إمتى سمعتها ؟!
ياد ياجبان ...
ترضع من امك شهدها ..
وتروح وتشكيها لغريب !!
ياد ياجبان ...
متقول لي إمتى عرفت عيب ؟!
جادل
وطنطن
وابتدي اعمل عندليب ...
بس جاوبني وقول لي إمتى عرفت عيب ؟!
يلعن أبو كل اللي خان ...
حاول يبيعها للغريب
طنطن وقول انت النقي ..
إنت التقي
واوعاك بشمسك تلتقي !
بس جاوبني وقول لي إمتى عرفت عيب ؟!
بتقول يمين ..
وعنيك بتحدف للشمال
واللي حرام ...
تخدع وبتقول لي حلال !
واما تجيني اصبر عليك ..
وبفجر تندهني لضلال !!
هات لي فصيل ..
ماخنتهوش
ماشتمتهوش
بتقول ح تبني وكله في الآخر ..
فشوش !
مافيش جدال
وان كان جدال ...
آدي المقال :
لو واد نضيف ..
لملم دماء الزرع من فوق الرصيف .
===========
