مين ده اللى فارش | سعيد شكري

مين ده اللى فارش
طرف شاله براح
ويدارى عيبى
لو انكشف سترى ..؟!
مين ده اللى زارع
جوه منه سماح
غير قلب طيب
موطنه سدرى ..؟!!

امى وحبيبتى ساعات
وساعات تكون بنتى
وساعات تكون صاحبتى
وساعات تكون اختى ..!!
وساعات تكون دنيتى
وفرشى وغطايا
مخلوقة من ضلعتى
ضلايتى ومرايتى ..!!

ساعة الشدايد فرح
ساعة الفرح بسمة
بنوتة زى القمر
واحن م النسمة
مهما اختلفنا سوا
دايما بنتلاقى
والقاها ساعة اللقا
احلى مافى القسمة ..!!

على كتفى مال شعرها
حبل الوصال اتمد
وقبل ما اوصل لها
قلبى اللى شارى اتهد ..!!
من عمرى كان مهرها
و ماهوش كتير فيها
والكل يشهد لها
بنت الاصول عنجد ..!!

ياضحكة طايلة السما
فينك ..؟!! .. وحشتينى
الحزن مش مطرحك
ولاعادش له فايدة
يلا إفرشى طلتك
يامنورة جبينى
نص القصيدة رماد
وتحته نار قايدة ..!!

ماتسلميش للوجع
وتبتى ف روحى
ده الحب لو تعرفى
بيطول الاعمار ..!!
بستحلفك بالذى
غطى على جروحى
مافضلش من دنيتى
غير طلتك ف الدار ..!!

وجوز حمام عشهم
مابين دراعاتك
ماتكسريش قلبهم
بالخوف بدون داعى
قومى العبى زيهم
ضمى بجناحاتك
هنعدى بيهم سوا
وإيديكى ف دراعى..!!

إعلان