طعم الوطن مرر اوي
حنضل حصى مبيتكسرش
والعطارين قايمين مزاد
مطحون هنا لساه بقرش
نطق العويل ابن الكلاب
من كل باب في القاهرة
فتح المزاد على إسم مصر !
احساس بعصر من الزمن
من كام سنه :
ثورة تسعتاشر هنا !
يا مجرمين -
بعديها حلفوا ان اليمين
قسما وفض !
وتاريخ مزيف يتنقل عبر العصور
مجرى العيون : كان اصله سور
سطر تاريخك يا وطن قبل البلاد
و ف يوليو عاش كل الولاد
فتح المزاد :
زفوا الملك على جحش مقلوب انما
عاش الملك متنعما
تأمين خروجه من البلد ( صفحة تاريخ )
مطوية في رمال خندقك
كمل يا واد لبندقك .. !
مسك ( النجيب ) حب البلد
حجزوه ف غرفة من الحديد
واهو مات ف قلب المعتقل !!
يالا الخجل!
حق الباريه راح ف التراب
البس بيادتك يا عجوز
والكتافات ويا النشان
حب الوطن ميت عشان
حكمك بيأمر غصبانية على التراب !
اقبل شهيد واتنين والف
اصل السياسة بتجري سرف
وملفهاش الا الصاروخ
ناصر بيأمر للحرس
شعبي يدوخ !
الليبرالية اتجمعت
والعلمانية اتجمعت
والاسلامية اتجمعت
والشعب مات !
دخان بايب - نفخه السادات
عفر علينا حضرته
اعلان ف حزب المسؤلين
وطني انا - هاحميك آمين
الحرب زيف : مين انتصر
مش بس انك خدت حقك ده انتصار
ارضك بتضحك يا سادات
وترابك اللي لجله مات كل الولاد
لساه عليه طبعا حصار
مين اللي قال انه انتصار ؟!!!
معزوفة الجبن ابتدت
والابجدية اتكلمت
تلاتين سنه :
حتى اؤتيتم م الهنا
ثورة يناير يا كرام
الشعب نام وسط القرف
وبصوت جنازة بتتعزف
تأمين كمان !!
خرج المبارك يا زمن
والشعب مات ،
ما تقولوا تعدادنا انتهى
واحنا هنفهم وقتها
ان الوطن مش بالمزاد . .
وتاريخ مزيف يا حرس
حتى الجرس
مبقاش يدق
والمحكمة متقولش ﻷ
لسه التراب حامي الحمى
والمظلمة : يونيو ابتدا
والشعب طيب واهتدى
ف متحزنوش بعد السكوت
وارضوا بقى ..
وادعولنا حبة من الزمن
لا يكون آخرنا المشنقه
والتهمة إيه ؟
التهمة عار ..
وان الوطن -
كان اسم اصلا مستعار !
اصله الكفن ..
شكرا يا مصر .
