ماشفتكيش
وليد الأسيوطي
ماشفتكيش
ماشفتكيش يامصر وانتي في النصر غرقانة
ماشفتش طول حياتي الا القرف
وشفت كمان كتير اهانة
كنت اسمع ساعات عن الترف
واسمع ان انتي عارفانا
ان انتي عارفة اننا هنا
ولادك برضه اللي انتي والدانا
بس الغريب
ان القريب منك مايعرفش الشرف
ان كان حرامي عامل عصامي
ولا خسيس عامل شريف
ولا نظيف ماهوش نظيف
ولا عصابة نَوَر كرهانا
عشان كدا يمكن هشام
قالك في يوم
مابحبكيش
....
ماتزعليش .....
ماشفتكيش ....
ماشفتكيش قبل النهاردة وانتي عالية ،
وانتي في عيون شعبك أميرة ،
وانتي غالية ،
ماشفتكيش كدا ، إلا في تاريخك القديم ،
بس التاريخ مايتقبلش يكون نديم
صاحب أصيل ينفع يواسي ،
عشان كدا كان الشباب
شايف ترابك قلبه قاسي ،
بس النهارده الوضع غير ،
شفتك بجد
شفتك عظيمة
شعب اتحد
اداكي قيمة
شفتي الشباب جايلك بيجري ؟
شفتي اللي كان عاوز يهاجرك
جايلك يقولك
اني بحبك ،
في اليوم ده ، جوه الميدان ،
وعلى كل أرضك
شفتك عزيزة ، شفتك كبيرة ،
شفتك تاريخ ، حاضر صحيح
كانت سماكي صافية وجميلة
والريح خفيف
نسمة هواكي هادية وعليلة
وصوتك مخيف
لكل اللي نهبوا
كل اللي سرقوا
كل اللي قتلوا
وكل اللي عامل كانه نضيف
شفتك يوميها ، احلى أميرة
وهناك في قلبي
في حتة بعيدة
عليها رماد
شفت الحقيقة
اني بحبك
زال السواد
خلص الحداد
على شعب اتقتل
30 سنة
وفي يوم انتفاضك ،
يوم انتصارك ،
خدتي عزاه ،
وساعتها بس ،
شفتك بجد
شفتك عظيمة
شعب اتحد
اداكي قيمة
فماتزعليش ان كنت يوم عاوز اسيبك
وانسيلي غلطة ...
مانا برضه حبيبك
