مدوره
هيثم نور
مدورة
الدنيا معايا مدوره
مهما بخطي
بلاقي نفسي بجيب ورا
بجري وبهرب مـ المكان
ولاقيني فيه
مهما عافرت
مربوط في ساقيه مدورة
ملعون أبو الأمل
إللي غاوي يضلني
يتسلى بيا
كأني لعبه صغيره
يويو ونحله فـ الإيدين
مكتوب عليها البعترة
مركون على رف الحياة
ودي قسمتي
ديلر في لعبه حظ
مش بتحبني
بخسر على طول الطريق
ومعايا ناس
فاكريني جوكر
والحياه.....فــ إيديا فاس
بضرب تراب الأرض
يتحول لماس
بس الحقيقه ومـ البدايه
وفي الأساس
إني يا دوب
دوبلير لفرخة محمرة
في روايه
فاكسه مشمرة
ملقتش ليا فيها دور
معرفش مين اقنعني
إنها سلمه
ومسيري هوصل
وبكرة أعمل ديكتاتور
وأديني أهه قربت
لابس لبس طور
في عيد ميلاد
مربوط
في ساقيه مدوره
