تقدير خاطىء للموقف
أمينة عبد الله
تقدير خاطىء للموقف
كل ما تحلم بحاجة ما تحصلش
إلا أنت
حلمت بيك فبل ما تشوفك
وحددت شقاوتك م الجروح اللى اثارها فوق ركبتك اليمين
وف حرف دقنك من تحت
ولما إتكلمت عنك صوتها اتقطع ببهجة شاردة
ومكانتش عارفة ليه هى مش مصدقة إنك حقيقة
وبتستنى علامة على جسمها حتى لو جرح
لما لمست قلبك
انجرح وريد محبة ف إيديها اليمين
من شعرة الشفقة اللى جواه
إزاى
مكنتش قادر بقدراتك اللى خلتك تجيلها ف الحلم
تفرق بين الشفقة والحب؟
إزاى
الحاجز الإزاز اللى بينك وبين الكون
هى مرت منه
واستقرت زى رصاصة حية ف عين متظاهر سلمى
تفتكر
إيه اللى باقى منك فوق ركبتها الشمال
وخلط الدم اللى حصل ..............؟
