ارحل بقه ...
أحمد عبد العزيز
إرحل بقه ...
مستني أيه ؟؟
لساك مصدق كدبتك
مستنى إيه !؟
30 سنه ؟!
الكيل طفح من حكمتك
مش ناوي يعني تهز طولك
ترتِحل
طب قولي فينك ؟
مش لا قيك
هو الحرس لساه كعادته بيوهمك
إنك إله
وان العيال دول برضه قِله مغرضه
شفت العيال ؟؟
طافوا البلاد
عرفوا الطريق
وانت الوحيد
عمال تتوه
وما حد عارف فين هتوصل خطوتك
شفت الولاد !؟
باعوا الأمل للموجودين تحت الرصاص
حضنوا القنابل اللي بتخلي العيون
تبكي حنين ..
تبكي أنين
تبكي عشان مصر الحبيبة تتولد
أسأل حبيبك اللي مش عادل وقوله
أيه حكاية بعض أفراد الشغب ؟
شوفه كده لسه عنيد
ولا الهتاف خلاه بعيد
وف وسط حراسه اترعب
مستني إيه ؟
ارحل بقه
ارحل كفايه حرام عليك
وحرام علينا لو هنسكت أو نخاف
مبقاش فاضلك غير تقول
يلا اسجدوا .. يلا اركعوا
حوالين ربوع العرش واسعوا بالطواف
ارحل بقه
لو لسه موجود وسطنا
اخرج بقه من جلدنا ..
خلينا نغسل جسمنا
عايزين طهاره لرجسنا
علشان نصلي يوم رحيلك ركعتين
ارحل وخد كل المناصب والنظام
ارحل بقه يمكن يكون
وقت الرحيل ساعه فرح
طال اشتيقنا اليها
ارحل والسلام
ارحل عشان تحفظ لنفسك
أي شئ م الإحترام
ارحل يا شيخ
ارحل دا صوت الشعب قرب يتنبح
ارحل وبطل غطرسه
ارحل وبطل كل يوم
تطلع تقول الدنيا حلوه كويسه
وتخلي كل الشعب يشعر بالمغص
من كلمتك ..من حكمتك
من أن فيه اصلاح وحريه وطبيخ !!
وتنادي فى الناس يصبروا
30 سنه !!
لساك عايزهم يصبروا
بستحلفك بالله يا شيخ
لو لسه موجود فى البلد
ققفل قناة النيل وسيبك مِنّهم
بيضللوك ..
بيحسسوك إن الحكايه هتنتهي
ويعود إليك الحُكم رغماً عنهم
أمرك عجيب ..!!
منتش متابع أي اخبار للولاد ؟؟
ولا انت لسه السمع عندك مشكله
أو ثورة الشعب فى نظامك معضله
!!؟
ولا انت برضه مش مصدق
إن وقت الشعب حان
وان النظام هش وجبان
وخلاص هتسمع بعد ساعتين مننا
أول بيان
بيقول خلاص ...آن الآوان
حتى الرحيل مبقاش فى إيدك
تعلنه
مبقاش وجودك أو رحيلك
يعني شئ
وانت كمان مبقتش لينا تعني شئ
اخرج بقه
مداري فين ؟؟
وفين كمان باقي النظام ؟؟
اظهر بقه
علشان نشوفك مره وحده
وبعدها هنودّعك
وداع يليق بالإنجازات
بالإصلاحات
بالتعديلات
ووداع حميم
نمحي بحرارته كل أعوام الشقاء
اللي جنابك عشتها
قرّب خلاص يوم الوداع
والشعب جاهز بالدموع
معجون شجون ..معجون عناء
عمّال يقاول جوه منه شعور غريب بالإشتياق
حالف يودع حكمتك
بأيدين كتييير رافعين علم
وايدين كتييير رافعين حذاء .....
