إعلان

الرئيسية » » بقيت بخاف م القاهرة | محمد سمير مصباح

بقيت بخاف م القاهرة | محمد سمير مصباح

Written By Unknown on الثلاثاء، 10 مارس 2015 | 3:49 م


بقيت بخاف م القاهرة 
محمد سمير مصباح


بقيت بخاف م القاهرة 
أكتر من الأول ..
م الوحدة والزحمة وفحولة العمارات وكل كبري كبير 
والخوف بيعمل سور 
ف القاهرة ..
نفس المكان يحتوي 
علي الضعيف والقوي 
الدوغري والمُلتوي
تلقيَ العلل ف السوي 
عشش ف ضهر قصور


فيها الشيطان عيل .. قدام ألاعيبها 
وانا كنت جاي فاكر ..هقدر ألاعيبها 
ليه ماقلتيلش يا قلبي م الأول علي عيبها ؟
وجبتني عشمان .. أغرق ف بحر حنان 
واسكن فلل وجنان .. والخلق نرعبها 
أنا كنت جايلك قوي .. 
دلوقت انا مكسور

ياعم طلعت حرب .. 
الدنيا عندك حرب .. بين مين ومين ؟ معرفش 
ممكن تقول مثلا:
القهوة والكافيهات 
الندوة والحفلات 
داير علي اللقمة .. وتاني خلف بنات 
القيمة والاناتيك 
بياع بفَرش / بوتيك 
بيلمع الجزمة .. وغيره ف إشارة يمسح ف عربيات 
دار نشر أو مكتبة / كتب علي الفروشات 
مشهور ومتهمِش 
وحروب مابتفرقش .. لاكن مابتلمِّش 
وحروب فروق ف الزمن .. فيها الزمن معصور

القاهرة ف شبرا غير ناحية الأوبرا 
وكذلك السيدة و(السيدة زمالك) 
تحس إن الطوب ف المبني زي الطوب 
لكن فروق طبقات بتعيد ف ترصيصه 
فات الجدع ع الحي 
قال حي ع الزحمة 
وحي ع القهوة اللي البشر فيها بنسخ كربون 
وحي ع العرق اللي نازل .. من زحمة المترو 
وحي ع الغربة اللي جوا الدار 
وحي ع الأسعار 
وحي ع الرشوة 
وحي ع النشوة 
وحي ع السيما ودلع مغشوش 
وحي ع العمر اللي عشته فاشوش 
وحي ع اللي مجاش 
والسُكْر بالخمرة و هزيمة ف مغامرة 
وحي ع المدنة 
والضرب والهدنة 
وانك تصلي ف ضهرك الرشاش 
ويكون قصادك جاية ترقص عاهرة 
علشان تكون القاهرة.


التعليقات
0 التعليقات

0 comments:

إرسال تعليق

نبذة عنا

Restaurants

يتم التشغيل بواسطة Blogger.

Travelling Diaries

Entertainment

Technology

Restaurants

Travelling

Entertainment

Technology

تسمية 4