وللوجع ... فوايد تانيه
عمرو شاهين
وللوجع .. فوايد تانيه
وجيا لي
سنين الضلمه تتعايق ب عُقد النور
أمل ب يعاشر الأحلام
يخلّف منها فكر حرام
ويتربي ف حرف ف كلمه دبلانه
قصيده فاتحها للأيتام
زمن ب يعاكس الملكوت
رزانة
ب تخطف الجنونه م الحالة
صور ع الحيط ب تضحكلى
وطعم الضحكة كومبارسى
ف وسط دموع
الصمت لحن ما نسمعوش
البسمه دمعه عمرها ماتبل خد
والحلم مهما يضيق
لازم يكون ع القد
الليل عفي
ب يجمّع العشاق على المساكين
شحاتة وساكنه ف الكورنيش
عاشق يعيش الحب متسوّل
وطفل يشق ريق قلبه
ب البحلقة في ضهر البنات
مسكين ..
طوفان
مقدرش يقلع الهم اللي راشق ب الجدور
ف السقف
مقدرش يتحدى الطبيعة ف انتحر
أصبح مطر
ب يرمى نفسه م السما ع الناس
يتكسّر حتت
تدارى فيها دموع حنين البنت للعبه القماش
وضفيرة سودا مجرجره
أخر دورين في " مساكه الملك "
وقليب ولد
كان تملى من بدانته
ب يترمى بين عرضتين
ب يصد اجدعها كور
معرفش ليه
قدرت عينيكي تنفرد بمشاعره وتجيب الهدف
فماكانش منه غير انه ب التوبة انحرف
أطلق اللحية الآلات
تعزف موسيقى تصويرية
لحظه دخوله ف قلب دين المعصية
ب تلملمي ف الجرح ليه
يا دنيا منزوعة الدفا
كل اللي كانوا ب يعبدوا نار المجوس
نحتوكى أصنام للوفا
وان كان سكوت العزرائيل
عن تاره م اللي كل ثانيه ب يلعنوه
كان محض خوف
يبقى انتظار الموت من بطن الحياة
لسعه قلق
طب إيه بديل القشة في أيدين الغريق
إلا الغرق ؟
