صقَّف وقال
محمد سمير مصباح
صقَّف وقال :قهوة ومعسل ..
وقعد يظبّط ف الباريه
بَص بعجَب حاجب وحاجب ع البشر
قال كلكم جهلة ومحدش فيكوا يعرف هو إيه
أنا المثقف ..
بقرا الكتب قبل اختراع حتي الكتابة والباليه.
..
شاف الجدار ..
قال :الجدار هو اللي بيشيل السما وقت اما بيموت الرحيل
جوه اللي بيعدي يلاقيه
شاف لحمة مشوية ف حطب ..
قال: الحطب كشكول معارك ف الزمن
ناس لما تجري بتجاريه
شاف التراب ..
قال : التراب دا مش نضيف ، مين يلمسه ..
يغسل إيديه
شاف الوجع .. قالك داريه .
وقعد ينظّر ع الحاجات .. لاكِنُه كان ..
زي المعيز تاكل ورق
لكن ماتفهمش اللي فيه !
