واكمني متعوّد
محمد سمير مصباح
واكمني متعوّد علي اني بعد ما ابكي ابتسم
بضحك .. يشوفني الناس كأني
بهلوان جاي م السما
مفطوم علي الضحك العبيط المفتعل
أنهار لوحدي أو ف صحبة
ندوب سوا نضحك يدوب
علي قد ما يجود الهبل
وده كان بيبقي لما قلبي يكون سليم
دلوقت كل قلوب حبايبي بقت شُرُك
يمكن عشان اكمننا م الطين
ننشف نصير احجار ضعيفة بتتفرك
وانا قلبي وسط الزحمة دي
ماهوش حِرِك
بيدوب تمللي ف كل غلطة
قلبي اللي عامله ودن قطة
الزمن حب يضايقني
قام قطملي منه حتة
كان يساع الخلق كله
دلوقت مش بيساعني حتي !
