ولد مخنوق ف دنيا بتعشق التوابيت
عمرو شاهين
ولد مخنوق في دنيا ب تعشق التوابيت
الممكنات
و الضل اللي الفارد سطوته ع القلب الخراب
وسنين بــــ تعشق فلسفه
اقتل ... تعيش
كلهم
ساكنين في قلب النص ده
وكأنها سرداب
متاهة
وفيها الوحش مستني
بطل أسطوري يدخلها
فــــ يخرج منها حدوته
و عدوده
بـــــ يحكيها الشجر للطير
وتحكيها الطيور للفاس
فيعزفها الوجع مواويل
يغنيها الحطب للناس
كان شيء غريب
طلبك يكون الدبح على صوت الموسيقى
موسيقى هاديه
موسيقى قادرة إنها تخلى سكينه الخلاص
ترقص سلو
فكان طبيعي يرقص الجلاد بـــــ نشوه
ينظر لعرق بــــ يجرى فيه الدم هادى
ولسن سكينه
نفسها
تأخد شور
بالدم
ويسألك بـــ بجاحة تقتل
نفسك تعيش ؟؟
فترد بهدوء منطقي
نفسك أنت ؟
لو أنت كان نفسك تعيش
ادبح بـــ سرعة
وبـــ هدوء
أرجوك
ماتقفلش الموسيقى
غير لما كل الدم يرقص ع البلاط
معاند الأحلام ف قلبه
بــــ يسابق التواريخ ف أوراق النتيجة
بـــ يخطف م المطر حبه
ويرميها ف حضن الموج
يصبر نفسه بسيجاره
يشوف في طرفها الوالع
نهار مستعجل المغرب
سحابه وسارحة ع الأفكار
وصنارته يادوب بتصيد
اوّض ضلمه ف عشه شِعر
ماكنش ب يكره الزحمة
لكنه كان ب يخاف
من نيون الفترينات
لأنها – على حد زعمه –
ب تفضح الألوان
وتغير الصورة
كان تملى ب يحلم انه ب يرقص
مع المانيكان
رقصه خاليه من الموسيقى
خاليه من دق الكعوب ع الأرض
رقصه تعزفها الإضاءة
رقصه الضل وخيالكِ
مبقتش قادرة تحسني
بتقول بعلو قلبها
- أنت ب تجرحني بسكوتك
مبقتش قادرة تسمع التواشيح ف قلبي
ف كان ضروري
اوطى صوت الناس
واعمل المطر سايلنت "" "" Silent
علشان تغنى لي على دق قلبي
غنوه شجن شفاف
يفك شفره الدقة
وتعرف إني بتكلم
ف صمت
يا أيها البحر الذي
عامل م الصدف كورنيش
زهقان أنا من ممارسه الحب .. حلم
ونفسي المس
ولو ف مره
أيدين صبيه
ماتبعتليش يا واد يا بحر
مع السمك
حته حوريه
لساك ب تحلم بالرحيل
رغم إن كل المعطيات
ب تجر خطاويك الجبانة
للخضوع
الهروب من فخ نفسك
بيوقعك ف المصيدة
اسلم طريقه للهرب
هي الرجوع
لما سألني ف يوم الشارع
ليه ب تدق بكعبك جامد فوق الأرض
قولت
بداري صريخ من ذكرى ب تنهش قلبي
جرح وعلّم
الكتمان ف القلب دواه
و النسيان ف البُعد مابينا
أصبح فرض
و أوعى تعاند الأوتار
يا ضل كمانجه ب يعزف ضل أغنيه
لطيف واحده
ب تعمل نفسها سمعاك
وهى معاك
ف ليل أجمل من الأحلام
ب تتمشوا على كورنيش من الذكرى
بواقي عمرك المعكوس
على بقع المطر في الأرض
ب تحكيلها عن اللي شوفتوا ف الرحلة
من المجهول
لحد بداية اللحظة
قمر صاحي
ب يرسم ضلكوا ف كوشة
عريس مجذوب
عروسه بس مرووشه
ومعازيم الفرح أشباح
تابوت م الاور متفصل دولاب ذكرى
جهازك يا ملاك حاله مش فضه
جهازك حلم
و أنا بالحلم ب توضئ
وبسجد للإله ركعة
عشان تبقى لي أغنيه
أغنيها ف وقت خروجي م الإيقاع
دى جمله ف أخر القصة
بطل أسطوري كنت أنت
و دلوقتى
بقيت حواديت
