فـ بلدنا
هاني مهران
فـ بلدنا
الليل ما بقاش زي الأول !!
بقى ييجي يزورنا
وبيطول!
فـ الناس اتقلبت أوراقها
والشجرة الطَالَّة على الترعة
والطَالَّة على الأحلام فينا
خافت واتدارت فـ ورقها
والتوت الأخضر ع الشجرة
إكمنه صغير
مش داري
ببلاوي بلدنا
بطل يسمع كل حكاوي الناس
للشجرة
***
فالناس زهقت
طهقت / قالت / سمعت / فهمت
سكتت
***
_عامت على عوم أصحاب الشجرة
من غير ما تأدف _
والطوب المتحدف ع التوت الأسود
ما بقاش يوصل
بقى يرجع من نص السكة
على دماغنا
ما بقاش فينا حيل
واتدغدغنا
وتعبنا من حدف الطوب
ع التوت الأسود
المتلبد جوا الشجرة
معشش فيها
ومخليها شجرة عجوزة
رغم التوت الأخضر فيها
***
وإحنا بنحاول نأْوِيها
نروِّيها فنقوِّيها
بس أصحاب الشجرة بتعْنِد
طول العمر يزيدوا أنينها
مش عايزينها بتوتها الأخضر
لأ
عايزينها تغير دينها
إلى شجرة تفاح م الأحمر
وأما عرفنا وشوفنا
فخوفنا
سكتنا خرسْنا
اتكتم النفس الطالع فينا
واتلمِّينا
بطلنا نحَدِّف بالطوب
وكرهنا التوت
وعشقنا بلدنا
( تم كتابتها 2005 )
