صوتك نشاز
أحمد اسامة
الارض غاوية تتمنك
فتأمنك على طرحها
وساعتها بس ياتشتريك..
يا هتشتهيك غربان ودود
اكمنها..دم السواقي العطشانين
وقت الحصاد..
اغلى ف عنيها من نياشين البرود
هتساوي كام؟؟
والارض ملهاش فـ الحرام!!
دي الارض بتاجر بشيء من عمرها
علشان تعيش
الذكريات..
والاشتياق للامكنة اللي ما تتنسيش
عرفاك ملول..عرفاك خجول
عرفاك تغيب وتحبها وتخاف تقول
ما تقولهاش..
دي الارض تتغازل بشبرين الغنا..
وصوتك نشاز
فـ ما تشتكيش لما الوتر..لو خيروه
ينحاز لفتارين الازاز
انسى اللي فات
والعب "كمان" على كام سنة..
جايز تعوض فـ اللي جَاااي
دا البخت بيخون الورق..
لو زَهرُه كان نساي
لساك غني سكر نبات..
عشق الحياة وحب البنات
وهتخسر ايه غير ذكريات!!
وسنين كتير متبعترة..
وحاجات نسيتها عشان حاجات
خلي السنين واهي تنفعك..
فتش جيوبك مرتين
حلمك معاك لكن سلف..
ولو انتلف فـ الرَد دين
والحلم ارض بتنتشي
والارض بنت بتختشي ساعة العتاب
البنت وردة فـ غيط غياب..
وريحتها صابحة فـ دبلتك
البنت واردة في الكتاب..
مكتوب عليها محبتك
هي اللي روحها تلملمك
وانت اللي عِندك فتتك..
وانت اللي باقي ع الـ مافيش
الارض تفرش سكتك..
وانت اللي سكة ما تتمشيش
