للبحر
صفاء أحمد صبيحة
عشان البحر يشبهلك..
عشقت البحر ..رحاله
وطعم الملح
والحاله سواء ماتكون
يموج البحر ويعادي
يخافوا الناس
وتسكن روحي ف الموجه
ولما يكون في يوم هادي
يفيض احساس..
في عز الزحمه والهوجه
عنيد لكن
ماهوش قاسي وعمره ماخان
ماهوش غدار
وعمره ماباح
في يوم للشط بالأسرار
ولما يخاف
بيسرد روحه ع الرمله
واكون سامعاه
بطمن روحه ترجعله
تعود وياه
عشان البحر يشبهلك
بخاف ع البحر من ناسه
يموت البحر ف الحواديت
ويوهب ليها احساسه
بحب البحر لو سارح
ومش داري بإني معاه
بينسى كتير اوي شكلي
اللي عاش جواه
بحبك حتى لو جارح
وجرحك ف الكيان مايطيب
ساعتها البحر بيداوي
ويبقى لجرحي احلى طبيب
صحيح قلبك وطعم البحر شيء واحد
لكن عذرا
هسيب قلبك
واروح للبحر