أحبك ...
أحمد عبدالعزيز
أحبك ...
بحبك مهما قال الكل
بإن الحسبه دي برما
وعمر الحرف والكلمه
ما تشفى حاله ميئوسه
وكدبوا لما قالوا كتير
بإن البوصه لو لبست
هتبقي حلوه كا عروسه
واحبك مهما جهدي قل
وصار اللغز فيكي كبير
وصار معقود وماله حل
واحبك
وبحلف إن في حبك
سعاده وخير
وحضنك زي حضن براح
عليه برتاح
وارفرف زي باقي الطير
واحبك
ومن حبك ما بطلب شئ
بحاول إني أوهبلك بحبي شئ
وخايف أصل جلادك مايعرف شئ
وهدفه إن فى التوهه هننسى نحب
نعيش ونموت ونمحي القلب
نحرّم إننا نحبك
نحرّم إننا نودك
منفهمشي عشانك شئ
بحبك
وانا فى الحب عالي رفيع
بكون معجون فى أحوالك
والاقي الهم فيكي يضيع
ولكن أكره اللي يبيع
وبكره كل من هانك
وكان فاسد وطبعه وضيع
وجنّد كل حراسك
على العشاق , على العلماء
على العواجيز ,
على اللي انتي لهم عكاكيز
على كل اللي حبوكي
على طفلك وهو رضيع
على مُلاك أراضيكي
لحد ما يجمع المقاطيع
لحد ما ينتهي م البيع
بحبك
واحب كتير أشيل عَلَمِك
وارفرف بعد فوز غالي
فى ماتشات كوره أو سله
ورغم الهيبه ما بخجل
اقوم ارقص فى أفراحك
واطبل ع الطشوط فى البيت
ويمكن حتى ع الحلّه
وبتعجب ساعات واسأل
ولا مره قابلت فى وسط أفراحك
ولا حتى فى وسط الهم وجراحك
ولا حاكم ولا مسئول
يادوبك ألمحه بالكاد
يا بيهني ..يا بيعزي
فى موجز أو شريط أخبار
وحتى لو بشوف وشه
بلاقي فيه خطوط إصرار
تتوهني واتوه فيها
واتوه أكتر فى حالة إنه هيوضح
دلائل حزنه أو فرحه
فى كلمة أو فى وسط حوار
معادله كلها مجاهيل
مفيش مُعطى
مفيش برهان
وناتجها فى يوم هيكون
مواطن ., بس مش غلبان
يمر بإنقسام مقهور
مع التعذيب
مع التخريب
ونرفع درجة الإذلال
لحد ما توصل الغليان
يثور ويثور
لحد ما يتولد إنسان
يحب بلا قيود فى النور
ويعلن نوبة العصيان
ويتحرر من السجان
