لو تعرفي
صفاء أحمد صبيحة
عارفه انا بحبك اوي......
ويمكن حبي ليكي هوه اللي مخليني اكرهك ....كل ما أحس اني مخنوقه بحاول افتكرلك حاجه حلوة ريحتني رغم انك سبب وجعي
تعرفي.....انا بحسك اوي وانتي لسه صاحيه من النوم لما يدوب الدنيا بتفرك عينيها وبتحاول تطرد عنها النعاس وكل العصافير تصحصح وتهجر عشوشها علشات ترجع بقوت اليوم
بحبك اوي...كأنك طفل لسه مولود ريحة البراءه لسه مفرقتهوشوبعشقك..لما الطل يمسح عن الزرع الشقا...ويرجع اخضر من جديد
بشوفك جنينه على كل حاجه ....إلا انا
بتكوني قاسيه اوي لما شمسك تطلع على اد مابتنورك على اد مابتحرقني وبتخنقني
انتي زعلانه من كلامي...................مش كده؟
بس انا والله بحبك معرفشي ليه انتي بتقسي عليا
انتي بتكرهيني؟؟؟؟؟؟؟؟!لو تعرفي اني مش بستحمل عليكي الهوا ...أو ان اي حد مهما كان يقول كلمه وحشه ف حقك .....بحس اني عاوزه أدمره
لو تعرفي ان ممكن اسيبلك روحي تعملي فيها اللي انتي عايزاه بس أحس انك بتحبيني ....
لكن انا مش لاقيه مقابل ........طب مش عايزه مقابل بس احس انك بتحبيني
لحد إمتى هفضل أحبك الصبح بدري وأكرهك ف عز الضهر وأموت فيكي بالليل لما القمر يصالحنا على بعض ........
انا بموت ......فيكي
يا مصر
