قاهره
صفاء أحمد صبيحة
محكوم عليك بالقاهره
كرباج بينحل ف الجسد
نشف خضار الروح جعل
كل الرياح مستنظره
تاخدك لفوق
وتمطرك للأرض
يمكن توضي القاهره
او تغسلك هي
يمكن تسلم ع الطرق
او تحضنك هي
يمكن تكون ..
دوبلير لدمعه استعصمت بعيون صاحبها
نزلت بحنيه.
شديت رحالك من هنا وصبحت كلك من هناك
شديت رحالي اليك هناك
الأرض دابت م الخطا
وقربت أمل
خايفاك أنا تنزع جدورك من هنا
فنضل
.
بستغربك
بتخاف أوي لو تنطلق وقت الصباح ويا البشر
وبتشتهي طعم الأمان
قدام العمود الكهرباوقت المسا جنب الرصيف
النوم ف حضنه مونسك
رغم الإضاءه المنهكه
والنور كفيف
وش البيوت ف القاهره
رغم انه متلون جديد
ألوان سعيده ومبهجه
بيبان مكشر لو تمر
فيبعدك
اليوم شتا
ارجع اليه بعد المطر
ارجع اليه
راح يقتربلك ..اقتربله
هيحضنك
..
يوميا بتفوت ع القهوه
وبتسحب كرسي عسى عيونك
تشرب وتعبي وشوش بتمر
فنجان القهوه اللي ف ايدك
متملل جدا بشرودك
مستني شفايفك تفتكره من كتر ما كات دايما تنسى
ف القهوه الوش.
بتحب النيل وبتهرب دايما تحكيله
وبتبدر حزنك ع الكورنيش
روح المره دي بدون شكوة واقعد وياه
خليه يفضفضلك وابكيله
ان حاول يبكي على قهره
واستعصى بكاه
الشارع والبيت والنبل والناس والقهوه
وحاجات تانية معرفتش بالقصد أسردها أو يمكن أصلا معرفهاش
تفاصيل بتعيشك ع الهامش
يلمحها فؤادك ف الفتارين
و يعيشها طشاش
