اوضه ف سطوح
أحمد أسامة
اصطادوك ازاي مشاعر
وانت شاعر
بالخطى فـ فجر الطموح
لسه ناوي؟
تمحي صوتك مـ الغناوي
قبل ما الانغام تفوح؟
لو خفت فيك الادان
والسكوت حاكم ودان
الصخب رغم الصمم..
جوة الودان بيزيد وضوح
وف ساعتها
المداين هتعاديك
والمجاهل هتداريك
وتهاديك فــ العيد جروح
والشرايع بتناديك
يابُنَّيَ اركب معانا
ونداويك
قبل مايفوت الاوان
مين هيأويك من طوفان
بالجفاف اجتاح زمان
وابتلع حتى ابن نوح
وانت وبشرع الصحارى
لسه بتهاب السفن
بس مش قادر تبوح
فان ما جاش الطفو صفك
والغرق باليم لفك
واتفرد ف الكرب كفك
ماتناجيش قلب الفتن
يمنحك حق الكفن
تحت اسوار الجموح
اللي فيها
فلسفات الحلم ليها
اتأولت اضغاث وطن
والرؤى اللي امنت بيها
اتفسرت منها المحن
خلف ابواب الفتوح
كان طبيعي الفجر يرحل
في غياهب الاتجاه
ضد بوصله انتماءك
اللي لما سايرها تاه
والعلة..
مش توقيت وفاة
العله فيك..
مش ف الحياه
ياللي انت بالتفريط زمن
غلبت حكم الظن موت
على محكم التوكيد نجاه
وارتضيت روحك تروح
مستعد تكون ماكنتش؟
لما يسلاك الزمن
لما تلمح..
تحت انقاض انهيارك
فوق توابيت انكسارك
الف ايد تقبض تمن
م اللي هيفيض من معاش
اللي عاش بعد اما عاش
والي مات يوم ما اتولد
وادفن فوق السطوح
