الهــــــــــــــدوء مـطــــــــــلـوب
أمينة عبد الله
الهــــــــــــــدوء مـطــــــــــلـوب
مدام قبلت
من حقك تبروزنى بالشكل اللى يعجبك
وتجمد مشاعرى لحين ارتفاع الاسعار
او اختفاء الصنف م السوق
احتكرنى
من غير كسوف
او خوف من حالة رفض مفاجىء
ما تخافش
ماعنديش روح
بس الهدوء مطلوب
ف نبش الجروح والتنكيل بالمشاعر
خللى عندك شياكة ف اختيار الادوات
اللى ح تخنقنى بيها
اعمل معرض
وبيع
دا الالم ارخص من انتظاره
