افرح
هشام صبح
شايف الفرحة
فاردة الطرحة
بتغنى وبتنادى عليك
:"الفجر شقشق,
ياقلبى اعشق,
واشكر الهك,
خلق وانشأ"
أنشا مداين
وقلوب بتفرح
بفجر باين
وغصن مايل
على شط بكرة
ولسه فكرة
تعمل عمايل,
والبخت ورقة,
مش للى نايم,
ولا للى قايم,
لا للى حالم,
وقلبه لسه
فى الحلم نونو
حلمه يصونه
من الهوايل,
خليها هى
تغزل طاقيتك
وتمد ايدها
تفرح بعيدك
وان عيدك انت
لسه مالاحشى
خليك فى عيدها
يطرح روايح
دا بكرة جايلك
وبكره أحسن
من اللى رايح
خليك معاها
خليك وراها
دى نجمة واحدة
بتدل تايه
لو بس شافها
وسط الغمايم
