دفعت انت كام
هاني مهران
دفعت انت كام ؟
عشان الحواري توافق تصاحبك
وترضَى بْصراحتك
وترضَى بْغبائك وترضَى بْبجاحتك
وتصفَى لجنابك
في لحظة مرورك تسد الحُفَر
تصلَّح مجاري
تداري عيوبها
تِسَفْلِت طُرُقها تهدِّي الزحام
دفعت انت كام ؟
دفعت انت كام
عشان المواصلة تجيلك لبابك
وكل الكراسي بتفضَى لجنابك؟
دفعت انت كام
عشان الرغيف يجيلك سليم
ما فِيهشْ النشارة وشكله العقيم؟
دفعت انت كام
عشان الكمين
يسيبك تعدِّى و"مُزَّة" معاك
ولمَّا يلاقي بطاقتك سليمة
يبوس فوق دماغك
وينسَى قفاك؟
دفعت انت كام
عشان الفطار؟
راجع حسابك، دفعت الجنيه؟
فولك وعيشك وحبِّة خضار
سيجارة بْبريزة
عشان العُفار
لو انت سعادتك دفعت الجنيه
فغيرك يا شاطر
بعمْلِة سِيَادَك يفتح عنِيه
وْورقة بمِيَة عشان اللي زيك
يصبح عليه
وْورقة بمِية عشان واحدة وطِّت
وباست إيدِيه
وْورقة بمِية عشان البطاطس تغيَّر نظامها
وتبقى بانيه
وْورقة بمِية سيجارُه يوَلَّع
وانت يا حسرة
سنانك تخلَّع وعينك تدمَّع
وماكينة لصوتك عشان الشكاوى
يدوبك تسمَّع؟
ما فيش شيء قبالك
غير إنك تِفَلْسَعْ
وتهرب بجلدك
وقبل أما تيجي تطالب بحقك
اسأل في نفسك:
دفعت انت كام ؟!
( تم كتابتها 2003 )
