حبة شوق
هشام صبح
حبة شوق
آه من خوفك
انك تصحى الصبح
ومتلقاش جنبك
انسان
بيمد ايديه يفتح صدرك
وقبل مايفتح صدرك
بيكون غاص جواه
لجل يصب فى قلبك شىء
من روحه
حتى ضعفك بين ايديه
دمعة رايحة
ردها
من قلب جرحه دمعتين
كلمتين
حتى حبيبة صاحبك
اللى لسه
أو اللى كانت يوم
بتصحى جواه الأنين
حبيتها عشان كانت قادرة
فى عز النوم
تصحى الكلمة جواه
صحيح القلب ده حاله غريب
على أد مابينبض جواك
ساعات نبضه
بيخليك تصرخ
لما تبص يمينك وشمالك
ومتلقاش
غير جوز حراس
بيعدو عليك أنفاسك
من غير مايمدو ايادهم حتى بمنديل
من طفل كان واقف على سلم المترو
يستجدى عطفهم
لجل يعيش
مع ان حلمه أبسط
من سبعين حور عين
مرجيحة صغيرة
او طيارة ورق
فى ليلة العيد
بنطلونك اللى اشتكى
من كتر مالفيت بيه
من رصيف
لقهوة
لشارع منور فى عز الليل
بخيال عمود واقف سهران
جنب غفير
بيتدفى بشوية حطب
مع واحدكل مشكلته
انه كان ليك صديق
على أد ساعتها الدنيا مابتسعكمش
بس برضه
مبتسمعكمش
طول عمرها كانت
(رقاصة خرسا,
ورقصة من غير نغم)
أه من دا الخوف
بكره تعدى ومتشمش ريحة الحطب
والا تبقى معدى وحيد
من غير مايكون وياك
واحد كل مشكلته
انه فى يوم
مد ايده فتح صدرك
ونزف جواه
حبة شوق
