(سنتين باعدّي جنب بيتكم بافتكر
فالصو الكلام عن حبيبتك
فالصو المشاعر والقصص
أرجوك..صهين ع الدق اللي نازل خبط فيك
و فـ روحك اللي غاويه هزيمة
وفـ شكلك المقلوب
دراكولا قلبك ربما
لكنه مش مذئوب)**
*
*
إحساس خفيف بالحب..
خلاها تخضعلك
أو هكذا اتصورت
إحساس خفيف بالذنب..
خلاها تسمعلك
وتطبطب عليك بحنّية مـ الخِشنة
وفـ معرض الذكرى..
فيه حاجة ممكن نفتكرها ننسجم
وحاجة لو نسيناها..
نسيانها يدوشنا
بنموت فـ لحظة ونفتِكر إسم لمكان
أو غنوة نازلة جديد
وثقافة النسيان..إنه مالوش مواعيد
وآفة النسيان..بتصيب إذا عِشنا
قلبك ضعيف جداً
قلبك مالوش فـ الحب
الشِعر بيهدّه..ويبعترك جواه
والعبرة مش بالشوق
العبرة لو تقدر توصل لآخر بيت
من غير ما تتشاهد
على عكس أول نَص سلّمته لعنيها
وطلع الكلام باهت
*
*
(سنتين بتكتب نَص واحد لَجل واحده
شايفك بتفرح بس برضو حزنت
سنتين قليل لجل تكتب نَص واحد
سنتين كتير أوي على أي بنت)**
*
*
خانت عنيها العهد ضلّت خطوتك
وانا يوم ما شفتك فـ الدموع ضليت
كانت بعيد جداً
عن منتهى الأحلام
عايشة لخيالها البِكر
كَدّبت أو صدّقت..عمرك ماهوش طازة
قلبك دخَل دبلان
شِعرك خَرَج بالفِكر
أما الجدير بالذِكر!!
*
*
(مالت وقالت ..هَيتَ لك
صدَّقت ليه إن انت فارس وانها..
محبوسه فـ القصر البعيد
ماكانتش بتحبك أوي ؟؟
ماكانتش بتحبك أكيد)**
=============
** المقاطع بين الأقواس من نص "كارلا" لممدوح زيكا
=============
أحمد أسامه ©
