كنتي فاكره البعد عادي !
هاقعد اتأمل في صورتك
يوم ويوم والتاني هازهق ؟!
كنتي فاكره البعد هايخليني ارجع لك بشوق الدنيا
زي الطفل لما يغيب في يوم عن حضن أمه
بعدنا غير كل ده
بعدي عنك مش فراق هاشتاق وهارجع
بعدي عنك زي ما يكون حد واخد مني ضلعي
زي ما تكون السما مخاصماني أصلا من زمان
لو هاتمشي بلاش تقولي غصب عني
لو هاتمشي بعد كل الحب ده
ابقي شيلي من ضلوعي الاشتياق
ده انتي يوم ما تغيبي ساعة
ببقى تايه زي عابر تاه في ملكوت ربنا
آخرتها إيه ؟!
هاتغيبي شهر
تلاتين خريف
هايعدوا على قلبي المريض من غير عيونك
تلاتين فراق .... يا قلبك القاسي !
تلاتين غروب للشمس
تلاتين رحيل
كنتي فاكره البعد هايخليني اجيلك باشتياق اكتر شوية
طب ما انا فعلا بموت من حبي ليكي
وكل يوم الشوق بيقطع مني حته
بستحلفك ... بالقلب والشوق والحنين والذكريات والعمر والناس والوجود
بستحلفك ... بذكرياتنا وكل تفاصيلنا البريئة
بستحلفك ... خليكي وبلاش البعاد
مالهوش لزوم
أو حتى خليهم يومين
بستحلفك بالليل ومج النسكافيه
دخان سجاير سبتها علشان عيونك
رعشة المطرة ف إيديكي
وحضن بينسيكي برد الليل وطوله
بستحلفك لو كان ضروري
ابقى شيلي من المكان ريحتك هدومك كل تفاصيلك
وشيلي من ضلوعي ضحكتك
يا ضحكتك
دلوقتي هاضحك نص قلب
ونص روح
دلوقتي هاعمل كل حاجة بنص انسان
نُصه غايب عنه في البلد اللي قسّوها عليا
بستحلفك لو مره بس وقفتي على قبر النبي
ابقى اسأليه .. ينفع كده ؟!
طايفه هناك
وانا قلبي متقطع هنا
كعبه هناك
وانا قلبي مالهوش أي قبله
لو شكيت لك
جوه أوضتي هاتسمعي ؟!
لجل النبي تردي لي روحي وارجعي
ماهو يعني
مايرضيش بعادنا ربنا
يا ربنا
انا قلبي سابني وراح يطوف عند الحرم
خليها ترجع جوه ضلع العاشق اللي مالوش مكان غير حضنها
