ذكرياتى
عن حمام يوم الجمعة بالليل
البابور الوشاش والليفة الخشنة
والواحد فينا بيتلكك لما يبقى نمرة 3 او 4
عشان امه تكون اتهدت وما تدعكهوش بالجامد
البنات اللى كات بتتكسف من ريحة الجاز يوم السبت
هى نفس البنات اللى بيفتخروا بسواد شعرهم الفاحم
وطلق الضفرتين ع الضهر
وابوك لما يضحك عليك وهو بيشرب الكينا
ويقولك دوا كحة
وينقطع قلبك م المزيج الصدرى ف وحدة المدرسة للسعال
وتشرب الكينا سرقة وتقول دوا كحة
ارجوك احفظ كل صورنا الابيض واسود
هى سندات ملكية للايام الجاية
