زى الشارع
مع كل ولاده شمس جديده
بفتكر الناى
ورصيف الشارع
وحبيبه امبارح
بتقولى ازاى
انا شبه الشارع
بنفض كل عروقى زحام
مع شمس الضيقه
وبفضى الشارع
مع ضحكه بنت بتدلع
لاجل ان اسمعها
وبخاول اظبط وزن الضحكه
كلام
مفروش على بسطه بتتمايع
مع صوت الضحكه
الشبه اللى ما بينى وبينك
يا رصيف الشارع
مش ضحكه بنت بتدلع
ولا عرق الواد اللى مفكر
الضحكه دى ليه
الشبه اللى ما بينى وبينك
اقدام الناس اللى بتجرى
ف عروقك همك
وساعات بتزيد الهم بضحكه
بتدارى الغم
انا زيك بردوا
بجرى الكدب ف دمى ساعات
لاجل انسى الهم
يا حبيبه امبارح
يا رصيف الشارع
انا بنفض كل عروقى زحام
لاجل انى اتلم على الضحكه
ويزول الهم
