فنجان قهوة ...
أمير لبيب
الفرق ما بين الدنيا و بينك
فنجان قهوة
الناس بتعشق طعمها
مع انه مر
و انت اللى بتموت فى ابتسامة
مرسومة سريالى حزين
فى قراية الفنجان
__________
فنجان قهوة
دخانه بيرقص قدامك
أخر تانجو
كانت مزيكته بتستقبل
اول لحظاتك واحدانى
دخان ..
بيداعب عدسات نضارة
ترجع تانى تفتكر الايد
اللى مسحتلك نضارتك
الفين مرة
و اتمدت الفين مرة كمان
تمسح .. دمعك
ــــــــــــــــــــــــــ
فنجان قهوة
بيعاند نسيانك بكرة
اللى استنيته من امبارح
فتتوه فى الوحدة الواسعة عليك
و تحاول توصل من تانى
لشطوط الناس
فبتوصل .... شط التغريبة
ــــــــــــــــــــــ
عارف ..؟؟
تفاصيل العمر يا واد
تابلوه
بتجمع حباته .. لحظات
التانجو الهربان م القهوة
و حزين الرسم السريالى
كلها حبات
لحظات
صدقنى
هاتشوفها مجرد خلفية
و انت بترسم مشهد تانى
يوم ما تقولى .....
.....
بطلت القهوة ..!!
