كان صعب
أسامة سند
كان صعب الضفر اللى ف إبهام الدنيا يسيبك
من غير خرابيش
تتعلم منها تخاف م القطه اللى بتشعر بالجوع
بس إنت بقيت مفجوع أكتر م الأول
وبنات أفكارك دلوقتى بتقلعلك ملط خلاص
وبدال ما تقوم تناغشها
بقيت مكسوف
كافر بالدمعه لكن مؤمن بالخوف
وساعات بتحب تقلد صوت اليتما
والبشاوات
والبغبغانات
والأبصر إيه
دلوقتى هتفرق عنهم إيه ؟
من إمتى الزلط اللى ف نظرات الناس
كان أرحم من سكتك الحافيه على الأرض المسكينه
وسكينة قلب المدبوح نجته من تحت السكينه ؟
صلوات العاجز
شبه الطابيه اللى بتحلم تتحرك سمبوكسات
والشمس راقات من سكر
بس ما بتدوبش ف قلب عصير التمر
إنت اللى هتخسر جوا اللعبه يا عمرو
بلاش تتحرك
قبل ما تحسب للكشه اللى تموت روحك
