يا شعب فزورة
أحمد البوهي
قيد ٌ وشرط
موتوا فإن الصمت موت
موتوا فإن هتافكم صخبٌ وكبت
موتوا بفعل ضميرِكم إن لم يكن قد مات
موتوا بصدق مرةً أو لا تموتوا .. فإنكم أموات
...
...
...
ويفيد بإيه الكلام ..
ويفيد بإيه السكات
ما تملكوش مـ الحياه غير ضحكة مكسورة
وقلوب بتنزف أمل مايبانش في الصورة
يا شعب فزورة
مايفسروش الزمان
لو ضاع شعور الامان
يبقى الوطن ضايع
وإن ضاعت الاوطان
يبقى العتب ع الروح
عايشين حلاوة روح
ولسه بنقاوح
يا شعب مش دريان
زعلان على فرحان
نغضب ووقت الغضب
نرجع وبنسامح
الضحك مالي الوشوش
والحزن على آخرة
وطن وجاب آخره
في النكتة ضرب المثل
والضحك بقى مغشوش
حتى البكا مغشوش
في الازمة تلقى الشطارة
في المغنى والتلحين
ونقول دي بلد الحضارة
واللحن صوته حزين
الخوف خرسنا سنين
ولسه بنقاوح
النسر محبوس في لونه
ازرق بلون الغم
اصفر كأنه الخريف
احمر بلون الدم
اسود بلون الزيف
بهتان بلون الهم
النسر فوق العلم
محبوس في سجن العبيد
النسر مل السكون والصمت والتقييد
ومجلس الشعب اخرس
رافع ايديه يسقف
يهتف بروح الجبان وبيعشق التأييد
والنسر فوق العلم
مخنوق وبيرفرف
بيقل في الخلق صوتهم
طول م العبيد بتزيد
النسر فوق العلم ونفسه يتحرر
مستني يسمع يشوف الخلق بتقرر
النسر عاشق يطير في سمانا ويحلّق
والخلق ملهيه ع اللقمة بتحلّق
ومجلس الشعب ساكت
ولا مرة بيعلّق
فرحان بكون النسر
عايش كأنه صنم
النسر مل خلاص رافض يعيش ع العلم
بقالنا شوف كام سنة
وبنفتخر بالهرم
يا شعب لمّا الكلام
يصبح بلا معنى
والجهل فاق العلام
ولا مين بيسمعنا
دا ياما دمّعنا
وآهو لسه بنقاوح
