هرشة دماغ
على كوكب المريخ
الهم ما يتلم
سلم لي ع السُكّري
ظأطط يا ولد العم
وحط ف بطنك بطيخة صيفي
وأوعى تعض ف مرة رغيفي
دول بيعاندوا ف جد أبونا
لأجل العيشة ما تصبح غم
ده حتى النسر الحيلة اتغم
فكك
نفض
احلق
كبر
اوعى ف يوم يا حلاوة تهتم
وعيش بسعادة
عيش بزيادة
اوعى تفتح مخك مرة
غمض عينك
سد ودانك
اعمل ميت
يمكن بلدك تصبح حرة
واوعى يا هذا تقولي لماذا ؟!
دول عبوا لنا الهوا ف إزازة
والدستور والانتخابات
والحرية والأصوات
والاستدعا للنيابات
أصل الميت لسه ما مات !!
نكتة جديدة يا ست تفيده
من مجموعة بهلوانات
والسيرك شديد مليان تنطيط
حتى التظبيط بقى ليه درجات
والتليفزيون بالصوت واللون
شغال دبور عمال بيزن
انفخ
حرض
اكدب
ولع
أصل الكدب يا روحي ده فن
والحدوتة متغطية
بلحاف فيبر م "السعودية"
لأجل الخير ما يزيد يا عنيا
والإنتاج يشطح ويرن
والعفريت يخرج م العلبة
يلعب لعبة
يمسك خشبة
يحشّ الرقبة
يرمي الكلمة ويا العِمة
يرقص رقصة بس بذمة
حتى الشيء اللي اسمه فلول
عمّال يُحرك زي الجن
ما كله يهون فسبيل السُلطة
حتى الدين
واسم "الله" يا عم
واوعى تفكر أو تتهور
أوعى يخش ف بالك ظن
اوعك تهرش هرشة بريئة
يمكن تحصل أزمة يا عم!!
اوعى تشارك أو تتغير
اوعك تضرب
اوعك تطلب
اوعك تفهم أو تتنور
اوعك تصحى
يمكن يصبح عندك دم!!
واقفل بابك وادخل جوه
اوعك تطلع حتى ل بره
دفي مكانك ويا زمانك
يمكن بيضك يفقس مره
وحط ف عينك حصوة ملح
لأجل ما تفهم هذا الشرح
يمكن تِرّكَز
يمكن تعقل
يمكن تهرش هرشة بريئة
يمكن يصبح عندك دم !!
