مكان في الماضي ...
هالة فتحي
نعم .. بتقول ناسيني
و مش فاكرني يا عيني
و لا بتشبه عليا ؟؟
للدرجه الجامده ديا
هانت عليك سنيني
مش فاكر الليالي .. و احلامنا الجميله
و الايام الخوالي .. اللي كانت طويله
دنا كل ذكري في عقلي .. و كل منام في ليله
مش فاكرين غير عينيك
و أثر لمسه ايديك
و كسوفي المستخبي .. ورا نظره أو تسبيله
اول احساس يخبط .. علي قلبي و افتح ليه
و ما كنتش راضيه أفتح .. ما انا كنت باخاف عليه
علشان سمعت كتير .. ع الحب و طول لياليه
و المجروحين اللي فيه
لكن .. ما قدرت أقاومك
و غرقت أوام في حبك
و نسيت احساسي عندك
و أمنتك عليه
و سمحتلك تشرق
و جوه عيوني تغرق
و كان ليك الصداره
و اتفوقت بجداره
فازت ايديك باللمسه
فازت عينيك بالبصه
و خطفت أول بوسه .. قبل نزول الستاره
و دبت مع الزمان
و سبتلي الحرمان
لكن .. كان صعب أنسي
اول شعور بالحنان
اول طاقه امان
و أديه .. فايت قصادي
ما فرقش معاه بعادي
و حتي مش فاكرني
ولا سابلي مكان في الماضي
عينيه .. ولا جت عليا
كشر .. ما سألش فيا
و نده بنته اللي جايه
يا بنتي .. حالتك حاله
شهلي و بلاش رزاله
اتأخرنا ..... يا هاله
