شارب الانوار "اهداء الى ذاك الرجل فى "نادى التجاريين".."
وف القهوه
بلاحظ ايديه تتكلم
وتطرد زحمه الحاضرين
بغايب ولا حاضر عدا ف عقله
وبتخيل..ف ميه صوره ماهيش واقع
عن السبب اللى كان دافع
انه يشرب الانوار...ف عز البرد
وبسأل قهوجى ملعون:
عن الضحكه اللى كات وياه
فبيقولى: انها فايتاه
وان الخل كان بايع
وان القلب مش قادر
على فراقها
وان دخانه ريش الفُرش للرسم
يشيل ف الصدر ريحه رسمها الباسم
يا قهوجى ملعون:
انقلنى اعيش جاره
لاجل ما اعرف
امتى يعرف
ان دخان السجاير..
ريشه بتعكًّر حياته
وبتخيل ..في ميه صوره ماهيش واقع
عن الخل اللى كان واقف
يقيم الحد ع الاحلام
ويجلد قلبه بالدخان
ياقهوجى ملعون
انقلنى اعيش جاره
اشرب الدخان ويشربني
واسمع كلام الروح وتسمعني
فنجان قهوتى المانو"
ماهوش كافى ..ينسينى عيونه السُمر
ملعون يا قهوجى مجنون
بتقول كلام وتقول
مافيش مجنون بيشرب الانوار..
ف عز البرد
وبيكلم ف دخانه
وجلبابه ماهوش ماشى
مع الدخان
فيمكن يمشى مع قلبه
وحافى يخطى ع العتبات
وخاوى ييجى لبلاده
بلا ميه ...بلا احباب
فسيبه يشرب الانوار
وانقلنى اعيش جاره
