.. ايام حضورك ..
السما
مابتعترفش غير بصوت الاوليا
ساعة الدعا
تعرف دموع المغرمين
عشق الاله
السما
ماتعرفتش ف يوم
على صوت الابتسام
كل اللى تعرف تعمله
تضحك سحاب
تبكى ..
مطر .. ________
زى السما
ايام حضورك يا وطن
زى السحاب مبهج اوى
و ساعات مفيد
لما بيطرح ضلة ع الاسفلت
... صوت الهتاف
صوت الشوارع ,,ـللشوارع
يسمعوه اولاد حلال فيغنوا بيه
تسمعه البنت اللى غايب
روحها عنها فى المسيرة الطيبة
تنزل تبارز كل حبات القلق
طول الطريق
صوت الشوارع
للجنون
ايام حضورك يا وطن
زى السحاب مبهج اوى
و ساعات كئيب
و ملون الكون بالرمادى من السما
و ملون الكون تلت الوان العلم بالدم
ايام حضورك يا وطن
تسقط مطر
يرخ جامد قد ما تحب الخيام
فى الاعتصام...
فى الاعتقاد
ان السحاب
كان مانع الهتافات وصولها للسما
و اما وصل
و شرخ حناجر صوتها احلى
من اغانى الست فى ليالى القمر
كانت مفاجأة مش لطيفة انه عرف
ان السما مابتعترفش
غير بصوت الاوليا.. ساعة الدعا
