فلسفة
ما تعلميني إزاي أحب
وأنا اعلمك الفلسفة
طب علميني إزاي تعود
البسمة ترسم عالخدود
بستان بيملاه الورود
يكسر مجاديف الحدود
يزرع حنان جوه الوجود
يخفي من الدنيا البارود
ويشيل من القلب البِرود
ويجيب مكانه الدَفا
طب علميني إزاي أحب
وأنا اعلمك الفلسفة
أنا فيلسوف .. بلسان فصيح
داير في وسط كون فسيح
بتجيبه ريح .. وتشيله ريح
عمره مايصرخ أو يصيح
كل اللي يملكه في الحياة
عقله الشغوف .. قلبه الجريح
حلمه ومناه
يعرف يحب ويستريح
أنا فيلسوف في كل شيء
إلا أمور الأفئدة
وإنتي بايدكي تغيري .. لأبعد مدى
معظم مشاعري الجامِدَة
يا ام المشاعر مرهفة
ماتعلميني إزاي احب
وأنا اعلمك الفلسفة
انا فيلسوف
غاوي يشوف
جوه الجواب
ييجي ميت سؤال
و ف وسط تلافيف الحقيقة
لازم يدور عالخيال
عمره ماآمن بالمحال
بيشوف طرق وسط الرمال
ويشوف سهول فوق الجبال
بس اللي نفسه إنه يشوفه
طعم المحبة و الجَمال
أنا فيلسوف بس إكتفى
من كل لغز الفلسفة
ماتعلميه إزاي يحب
ويعلمك الفلسفة
