خايف
محمد الأقطش
نفسي أفرد لك
شراعي الأبيض .. الشفاف
نفسي أحكي لك
عن اللي جوا قلبي
بدون ما اخاف
نفسي لو يوم
تفرشي صدري الحرير
بدموعك المزروعة شوق
يخضر صدري
ويرتوي بعد الجفاف
يشتد عودي
أعزفك موال جميل
على لحن عودي
أكتبك غنوة وجودي
أرسمك فوق الخريطة
حدودي
أبني ليكي وبيكي داري
تبقي ليا في انتصاري
وانكساري
والنجوم اللي في مداري
تبقى هي عينيكي انتي
نفسي أقولك :
" يا حبيبتي "
بعلو صوتي
.. بس خايف
