إنتي و أنا
إبراهيم الصمدي
إنتي و أنا
و الحق ..
و البوح ..
و عيون كتيرة مغمضين ..
نفس الجوار و الأمكنة
نفس الوجع
نفس السؤال السرمدي
هو احنا كيف و ليه و مين ..
" كل الطرق مبتوديش لروما
كل الطرق بتودي لعنيكي
إزاي هنقدر نبتسم و نحب
و أنا شايف الاحلام بتكويكي "
تفتكري لما هقولك اني بعشقك ..
الكون هيفرح ..
و العصافير راح تزقزق ..
و السما هترقص تنقط ..
م السحاب حبة مطر .؟!
و القمر .. هيقوم يغني
غنوة علی شرف الأحبة
و النجوم تعزف كلامي
و الأفاعي هتستخبی
و الحياة راح تبقی احسن
و الوجع هيخف حبة ؟!
تفتكري هذا الكون بيؤمن
بالعشق و الأشعار
و بيستخبی زينا ف الحب .. و الغنا .. و الموسيقی .. والكلام
علشان يغطي عجزه عن ردع الالام ؟!
الشعر ..
سلاح العاجزين .. - زيي -
لتحقيق الرضا
و تزيين السكات
" تفتكري كل الكون هيفرح
لما اقولك حبي ولا
لما اجيب حق اللي مات ؟! "
