الأولى...........تدوم
هشام صبح
تعا دوج العسل
سايل على فمى
......................
من شط بحر الهوى
طلتلى جنية
غمزت بحنية
و العود على قوامها
فايح بتفاريحه
مال القليب ميل
ميلة كده قوية
"_خليك حنين يا ولد
الحب حنية
مهوش كلام باللسان
ولا بايدك,تعا فيّه.
_مديت ايدين تخطفِك
_وقف هنا شوية
_الصبر راح منى
_خبيته بايديا
لجلن أشوفك نار
لكن ما تحرقشى
نار بارده كده و سلام
فى حيضانى مسقية
و الصوت يا واد فين راح؟
_ملاقيشى أغنية
تملا جناينك نور
دلينى يا صبية.
مالت كغصن البان
_صبرك أنا غلبان.
ضحكتها رنت هنا
فى نواحى شمالية
غنجت على كتفى
مالت على صدرى
ما احلاكى يا حورية
مكتوب على جبينِـك
ست البلد دية
_تطلع كمان بكّاش؟
_يا خوفى من دى النية
_بس اللى انا شايفاه
مكتوب على جبينك
تخطف ورود خدى
و تفوتنى وحدية
_كدب القدر يا اولاد
بصى كده شوية
مكتوب على كفى
أتقل أنا,تخفّى
و فى يوم تروحى انتى
أفضل انا وحدى
_اسكت
مكانك هنا
ما انتاش غريب عنى
بلدى بعيدة هناك
و اياك
كمان اياك
ان رحت يوم,تيجى
الليل و انا و اياك
و الليل ملوش آخرة
افرح معايا بليل
و بلاش تكون طامع
قلبك مهوش جامع
لجل الصبايا الحور
و اللى عليها الدور
مهيش عليها العين
لا انت نصيبى ولا
من يوم نصيبى تكون
_اه على قلبى
_ سلم,سلام قلبك
_عرافة تكونيشى؟
_ما كنت و لاأكونشى
دوغرى أوام تمشى
ليلك خلاص انتهى
_طب بس ليلة كمان
_بكره الصباح يطلع
_امتى الهوى يجمع؟
_لابد هتفارق
و تدوق و تتدوّق
و تتوه كمان فى المدا
تشكى لده و لدا
ما تلاقى يوم صبرك
و يضيق كمان صدرك
_ضمينى على صدرك
_وقتك خلاص انتهى
روح
ما عادش ليك مننا
سوى كلمة سلام و أمان
