... مش عارف عذر
أمير لبيب
مصلوب على عودك
ممنوع عليك الابتسام
ممنوع عليك الغضب
ممنوع عليك حتى الكلام
الخوف اساس نشأتك
الخوف من الايام
الخوف من المجهول
او حتى من بكرة ...ـ
_________________
مش عارف ليه
انا لما بشوفك بلقانى
مليان احزان
و بحس بصورتى جوة مراية
معكوسة عليك
من اخر نقطة فى قلب الكون
انا اصلى كمان
اوقات غلبان
و ساعات خايف
من مُر اليأس و م الايام
و ساعات متكتف بحبال صمتى
و خوفى و عجزى و كونى جبان
و ساعات بتخاف منى طيورى
تهرب و تروح لأمانها بعيد
و ساعات يستهزأ بيا الناس
فأقتل كلماتى على بوابة الصمت
الخارج منى بدون احساس
و بحن كتير للأرض البكر الطرَّاحة
لكن بتألم لما احضنها الاقيها تراب
و القانى بدوق
من نفس مصيرك
ـ....... اخر العام
ــــــــــــــــــــــــــــــ
مش عارف عذرى انا يطلع ايه
فى الموت و العجز و فى التقييد
فى الصمت و عدم الشوف و الخوف
لكن عارف كونك معذور
علشان تكوينك
........
خيال مآتة
