سكـــــتــين ...
هالة حجازي
على سكتــين
ماشيين في نفس الاتجاه
خطوتنا واحده و الطريق واصل مداه
و لا اتلاقينا في اوله
و لا حتى ضامنين اننا نعتر سوا على منتهاه
رغم اننا
ماشيين في نفس الاتجاه
.
و ليه عينيك مش شايفه احساسي البراح
و لحد امتى حتبكي ع الماضي اللي راح
كما الرماح ماشي الطريق
زي اللي مشدود بالبريق
شردت عيونك عن دموع فاضت على قلب الغريق
و انا كل ده مستحمله
موجوعه بس مكمله
عشمانه يمكن نلتقي و السكه تصلح ما انكسر
ما هو مستحيل قلب النبيل راح يبقى للاخر ... حجر
.
بس الغريب
انك في غفله الاندفاع
مش حد بــــاع
راسم طريقي جنب خطوك بالتمام
بالعدل مديني اهتمام
بالنخـــوه زي النار بتبقى ان حد يرميني بـ سهام
و بتبقى زي الطفل لو حسيتني بأبعد
و تهلل الفرحه فـ عينيك ... اذا كنت أسعد
و ان مال حـنــيني ينفرط حــــدك هـــدر
و كأن قلبك من صوان حالف ما يستاهل ... بشـــر
.
و السكه بتطول بس خط العمر أقصر
و لحد امتى يا سنين حتطاوعي أصبر
على سكتـــــين
خطاوينا فيهم زي إيماننا بقت أشــبه بـ فرض
لكن الحقيقه اني بأخاف
يكون شريط سكه حديد
و السكتين دول عمرهم ... ما يلاقوا بعض
