الحريف
هيثم نور
حريف أوي فـ شوط الفرص بره الخطوط
أشطر مخاليق ربنا .. فـ حفر الاسامي على الشطوط
...........................................
أجدع هديه بـ يتمسح بيها البلاط .. بمزاج وكيف
وقت الحياه اللي اتصرف .. على عمر كل فصوله صيف
على قصه كل صورها زيف .. فـ حكايه عشت انا فيها ضيف
...........................................
حريف أوي فـ رسم الملامح مشغولين
واللي يدور يلقى نقش غراب حزين
..........................................
والوقت بيعد فـ ثواني تقص عمر
وثواني ايه دي سنين رميتها بكل فخر
.........................................
مقدرش أقول أعرف ملايين البشر
لكن رهاني على اللي خالق دي البشر
مافيكيش يا دنيا حد ناسيه القدر
محتوم يمر بفرصه تهديه القمر
........................................
يفتح عينيه يحضنها يبقى ملك و سيد
يقفل عنيه يهملها يبدأ من جديد
مهما الغبا مهما العمى يكون شديد
لازم في يوم يلحق له فرصة يعيش له عيد
........................................
دلوقتي بس عرفت ليه ... محبوب من الناس كلها و مليش خصوم
أصل الخصام مخلوق يعطل سعي ناس عايزة تقوم
قوم يقفشوا .. قوم يعندوا .. قوم يصبروا .. قوم يوصلوا
........................................
ما قابلتليش في الكون ده يوم أبدا مثيل
مولود بعُقد من الفرص .. يكفي يعدي ألف جيل
........................................
كل المراكب تشتهي أفرد شراعها و أروح بعيد
أفردها يوم .. أتنين .. تلاته بعزم أقوى من الحديد
أضرب بمجدافي على وتر الزهق.. و اعود شريد
........................................
تعزمني تاني مركبة أركبها تاني و هكذا و هكذا
تمضي الحياه مستغلسة تكراري كلمة هكذا و هكذا و هكذا
أخطر خصومي و العدا .. نفسي أنا .. إللي بتكتب كل دا
........................................
حريف أوي بحشو الدقائق بالـ مافيش
حريف أوي في شوط الفرص برة الخطوط
