كل ده وبتقول لوحدك ؟
محمد السيد عبد العزيز
ربما وحدك مكمل
في طريق الـ 1000 ميل
ربما بتشق وحدك100
غيامة و1000 ليل
ربما بتشوف سعادتك
ف انبساط الكُل جنبك
ف انبعاث الضحك منهم
ف اجتهاد تعديل مصيرهم
و اجتهادهم لجل تبقي
أعلي أول .. مش آخرهم
ربما بتشوف سعادتك
ف انتصارهم لانتصارك
و انحصارهم لانحصارك
و اصطيادهم لون نهارك
لو هيبقي قصادُه ليلهم
ربما بتشوف سعادتك
ف انتحالهم دور يناسبك
و النظر في حلول مراسمك
وابتسامهم وقت رسمك
ضحكه مش قادره تخايلهم
ربما بتشوف سعادتك
ف احترامهم صمت بوحك
واعتيادهم ضحك نوحك
وف محاولاتهم تمللي
لضم خيط يلضُم جروحك
يُلضُموه مع ضي عينهم !
ربما بتشوف سعادتك
طبطباتهم فوق كتافك
فردهم ف الليل لحافك
نني عينهم لما شافك
واما برّد لك قدوحك
كُل ده وما انتاش شايفهم !
كُل ده وبتقول لوحدك ؟
وانت كُل الحُب جنبك ؟
وانت شارب حُب جنه
جوا ناس ديماً مآمنه
إن فيك الطاقة كامنه
بس بيقفّلها لوحك !
كل ده وبتقول لوحدك ؟
مش لوحدك ده انت هُم
وانت بيهم شِبه أُمّه
لو تطولك ألف غمه
كلمة منهم تشفي روحك
مش لوحدك !
