لا انا شاعر ولا حاجه
أحمد عبد العزيز
وبحلم أن يوم أبقى
عميد الشعر والشعراء
ويوسع حلمي ع الآخر
واروح واتجوز الخنساء
وقلت لنفسي ياد جرب
ونمت وكنت ناويها
قابلت الوحي ف منامي
وقالي وصفه هحكيها
دا هيه حروف وبرميها
على ورقه
أوديها يمين وشمال
وبعديها..
أشوف موضوع
يليق بيها
لا انا شاعر ....ولا حاجه !
دي سبوبه
قلم شاطر
يطير ويحط ع الورقه
يروقها
يزينها
بحبة محسنات فارغه
وف الآخر أقول الله
عليك يابني شوية شعر
م الآخر....
جميل اللفظ والمعنى
صحيت الصبح من حلمي
لقيت نفسي صحيح شاعر
وبتمخطر على الصفحه
تشلني الناس وتحملني
وتتغزل ف ألفاظي وتحفظها
بقى للكلمه ميت معنى
ودا يفهم على كيفه
وده يفهم على كيفه
وانا ساكت يقولوا الله !
ده حتى الصمت ليا بيان
وانا ساكت ومن جهلي
يقول الناس ياسيدي كمان
وعينهم تبق ف عنيه
وتفهم من عيوني كلام
ساعتها عرفت والله
ده رزق وجي م الرحمن
