علامات قابلة للكسر
شريف حسن
المينا .... ميادين روحك الزحمة
القهوة .... حفلات السّكر ويّا نجيب ، أمل ، درويش
المترو .... ناس بتعدي في دمك يخرجوا عرق
كلها أماكن عامة
أما جزيرة الدم المتجلط جوه الصدر
ممنوع الدخول غير للفرجة على أول و اخر مركب غرقت هنا
!كوابيسك تتفسر أحلام ؟
.. عشمان
!هتعيد الدور ؟
تصرخ في الماضي بكل سخرية
تصدق ماعرفتكش شكلك أتغير جداً
!! أسمك كمان بقى مستقبل
نِسيت كل تراتيل الوحي
نسيت لما صرخت : أيه شعورك يا وحى لما كنت مكاني
.. اختيارك الإجباري للوحدة
خلاك تأمن بوجود أحاسيس .... أبعد من النجوم
هتسافر في الصحرا تصاحب كل الشجر النادر
تِرجع لحظات الفرح القديمة
تعيشها بسذاجة طفل و عبقرية نصاب
.. مادورش على شجرة مريم
قلبك مش بِكر
عنيك صبحت زينة
و بصيرتك مش على قد الوهم
الشك أكبر يقين
القدر ، الرضا ، السعادة ، الجنون ، الحب ، الحياه
أكيد لو كنت فهمتهم ماكنتش جتلك "
و لاّ كنت انتشيت لحظة الموت و تمتمت
ح
ظ
و
ظ
