يارب ياللي خلقت كل شيئ بميزان
محمد سمير مصباح
يارب ياللي خلقت كل شيئ بميزان
وجعلت جوه الفرحة فيه أحزان
وحتي الشِعر يتقلب علي الأوزان
أنا تايه.
سايبني ف وقت مش عارف
أطول فيه أي شيئ من فوق ولا من تحت
يارب من الحياة تنحت
يارب الجيل بحاله بقاله عمر طويل علي دا الحال
بقينا نحب بمشقة
وبندور علي الشقة
بنتغرب ومش فارقة
بنتهرب من الفُرقة
ونستغرب ودي الغَرقة
ونتجوِّز إلي الأُلفة إلي الخِلفة إلي السُلفة بلا كُلفة
نعيش شُرفا .. نموت أندال
فلجل ما أي شيئ يختل ف الكوكب
يارب ادينا سكة بدون ما نستغرب
ولا نزعل ونتغرب
ولا ابقي يارب متقلب علي الأحزان
ولا تايه !
