تسمحي .... نتمشي شوية
تسمحي
نتمشي شوية
ونغيب عن عيون الناس
نسرق م الدنيا
خطوتين
نتنفس
حبة إحساس
اختاري انتِ الطريق
وعيوني وقلبي
الحراس
يحموكي م المطره
و م الشمس
تسمحي نتبادل
حبة همس
من شفايفنا
دفي مشاعرنا
يدفي حروفنا
كل الناس م البرد بتشكي
وإحنا العكس
تسمحي
أحكيلك عن وقت
لما انا كنت خلاص قررت
أني أتلف في كوم أحزان
وأن مصيري أعيش
ندمان
فجأة لمحت
عيونك دول
غيروا كامل .. ذرات قلبي
صبغوا الكون بلون
مش معقول
رجَّعوا تاني الفرحة لعيني
بعد سنين م الصمت
رجعت أقول
"تسمحي
نتمشي شوية"
كل شوارعي تايهة في ضلمة
لو تسمحي
تكونيلها النور
تصحي مدايني
بعد العتمة
علي أفراح وهنا وسرور
يرجع تاني قلبها ينبض
لما تكوني
أنتِ الساكنه
بيكِ
وليكِ
بيوتها هتبقي فلل وقصور
يفتح كل النبض بيبانه
وبعد سنين
يكتب في سطور
"تسمحي
نتمشي شوية"
أي مكان تحبي
نروحه
قلبي ما صدق
صادف روحه
ولقي في اديكي
دوا لجروحه
بلمسه كف
نسي أيامه
ونسي أحلامه
وكل آماله
تقبلي بوحه
لما
أتجرأ وأفتح قلبي
وأطلب منك
أجمل أمنيه
لو
"تسمحي
نتمشي شوية"
