سؤال
هشام صبح
يا قولة لا جاوبينى
فنيت عمرى فى بحر عنيكى
موصلتش
و داب اسمى
على رسمك
مااتبسمتلى فى يوم زهرة الرمان
على شفايفك
نهيت جسمى عن الحلم اللى مش حقى
لكن حقى فى يوم ميلك
تميلى على هوى روحى
و لا تروحى
و لا تزيدى فى يوم وجعى
عشقت الصمت و اتصوفت
فى محرابك
على بابك
يسيل دمى
عشان غفران من ذنب
معملتوش
انا اللى خرجت م الجنة
عشان خاطرك
بقيت مطرود
شراع مفرود على صفحة جبينك الصافية
فى العشق قالو مفيش ممنوع
ولا يفيد من الغرق ده رجوع
امتى يميل الحرف على كيفى
و تلينى غنوة فى تنهيدى
و تبقى شهادة يوم موتى
أغنيها
